ඉරෙන් එළිය ගෙන ආවා [Iren Eliya Gena Awa]

ආයුබෝවන් ඔයාලාට.අදත් උදේ පාන්දරින්ම තවත් ලස්සන විරිදුවක් අරගෙන මම බ්ලොග් එක පැත්තෙ ආවා.විරිදු කියන්නේ අපේ සිංහල ජන ගීයේ එක් වැදගත් අංගයක්.මුල් කාලයේ නිර්මාණය වූ සිංහල ගීත සඳහා විරිදු රබාන නැතිවම බැරි වුණු අංගයක් වුණා.වර්තමානයේ නම් දක්නටවත් නැති අපූරු සංගීත භාණ්ඩයක් වන මෙයින් පැරණි ගීත ඉතා රසවත් අයුරින් ඉදිරිපත් වුණා කිව්වොත් මම හිතන්නේ මම නිවැරදියි.මෙම විරිදු ගීතය ගායනා කරන්නේ ජනප්‍රිය විරිදු ශිල්පිණියක් වන දයා නෙල්ලම්පිටිය මහත්මියයි.ආදරය ගැන කියවෙන අපූරු විරිදු පන්තිය රස විඳින ගමන් ඔබේ අදහස් එහෙමත් පහළින් කමෙන්ට් කරගෙනම යන්න.

ඉරෙන් එළිය ගෙන ආවා මතකයි

සඳෙන් සිසිල ගෙන ආවා මතකයි

මලෙන් සුවඳ ගෙන ආවා මතකයි

මගේ ලොවට නුඹ ආවා මතකයි

ඉරේ හිනාවට රන් කෙඳි විසිරුණි

සඳේ හිනාවට පිණි මුතු ඉපදුණි

මලේ හිනාවට බඹරුන් ඉගිළුණි

නුඹේ හිනාවට මා හද පිබිදුණි

හිරු රැස් වැටිලා කෙත බබලාවී

සඳ රැස් වැටිලා දොළ දිලිසේවී

රොන් සුණු ඉසිලා මල හිනැහේවී

සෙනෙහස පිරිලා නුඹ හමුවේවී

ඉරේ කිරණ ගිරවුන් සතපන්නයි

සඳේ කිරණ සාවුන් සතපන්නයි

මලේ සුවඳ බඹරුන් සතපන්නයි

සිතේ සෙනෙහෙ හදවත් සතපන්නයි

ඉරේ ඉඳන් මල් මාල පැළැන්දා

සඳේ ඉඳන් මුතු මාල පැළැන්දා

මලේ ඉඳන් මල් මාල පැළැන්දා

හිතේ ඉඳන් පෙම් මාල පැළැන්දා

හිරු රැස් කෙන්දේ මල් දැමිණෙනවා

සඳ රැස් කෙන්දේ මුතු ඇමිණෙනවා

මල් මකරන්දේ බිඟු පැටලෙනවා

රෑ යම නින්දේ නුඹව පෙනෙනවා

ඉරට වඩා එළියයි නුඹෙ සෙනෙහස

සඳට වඩා සිසිලයි නුඹෙ සෙනෙහස

මලට වඩා සුවඳයි නුඹෙ සෙනෙහස

හිතට සදා උරුමයි නුඹෙ සෙනෙහස

ඉරක් එළිය නැත රන් කෙඳි නැති කළ

සඳක් සිසිල නැත බොල් පිණි නැති කළ

මලක් සුවඳ නැත මුවරද නැති කළ

සිතක් මිහිරි නැත සෙනෙහස නැති කළ